Беларусы рыхтуюць выставу, натхнёную творчасцю Алеся Пушкіна

6 жніўня ў музеі вольнай Беларусі, які знаходзіцца ў цэнтры Варшавы, плануецца адкрыццё незалежнай выставы «Застацца/Zostać», прымеркаванай да 60-годдзя мастака Алеся Пушкіна. Арганізатары абвясцілі збор сродкаў.

— Свабода — гэта не геаграфія, а стан душы. І мастацтва — лепшы спосаб пра гэта сказаць. Падтрымайце выставу «Застацца» — каб галасы беларускіх творцаў гучалі, дзе б яны ні былі! — тлумачаць арганізатары, чаму гэта важна.

У экспазіцыі будзе прадстаўлена каля двух дзясяткаў мастацкіх работ, аўтары якіх натхняюцца творчасцю Алеся Пушкіна і таксама шукаюць у сваіх карцінах, інсталяцыях, перформансах адказ на пытанне: што такое свабода, калі ты далёка ад дому? Як захаваць унутраную свабоду, памяць і свае карані, жывучы ў выгнанні?

Да 20 траўня прымаюцца заяўкі на ўдзел ад мастакоў і мастачак. Усе ахвочыя (вядома, пры ўмове, калі для вас гэта бяспечна) могуць падтрымаць праект данатам праз платформу Gronka — для арганізацыі выставы мяркуецца сабраць 3 тысячы еўра, пры гэтым уваход для наведнікаў будзе бясплатным.

Адкрыццё яе анансаванае на 6 жніўня 2025 года — дзень, калі Алесю магло б споўніцца 60.

Таксама творчая каманда вядзе архіў слыннага мастака, старонку ягонай памяці ў сеціве і працуе над выданнем альбома з творамі Алеся Пушкіна.